لاہور (ڈیلی پاکستان آن لائن) دو غیر ملکی خواتین کو مبینہ طور پر اغوا برائے تاوان اور ان کے ساتھ زیادتی کے مقدمے میں تحقیقات کے دوران ملزم باس کے حوالے سے اہم انکشافات سامنے آئے ہیں۔
نجی ٹی وی چینل جی ٹی وی کے مطابق مرکزی ملزم باس وحید طاہر کا تعلق ضلع اوکاڑہ کے علاقے عزیز پارک سے ہے۔ اس کی فیملی اوکاڑہ میں مقیم ہے جبکہ وہ خود کافی عرصے سے لاہور میں رہائش پذیر تھا اور مختلف مقامات پر اپنی رہائش تبدیل کرتا رہتا تھا۔
ملزم باس وحید طاہر کے خلاف گردوں کی غیر قانونی پیوند کاری، قتل، پولیس مقابلے اور دیگر سنگین نوعیت کے متعدد مقدمات پہلے سے درج ہیں۔ بتایا جاتا ہے کہ وہ طویل عرصے سے گردوں کی غیر قانونی پیوند کاری کے مکروہ دھندے میں ملوث رہا ہے اور اس سلسلے میں ماضی میں گرفتار بھی ہو چکا ہے۔
تحقیقات سے یہ بھی سامنے آیا ہے کہ دونوں غیر ملکی خواتین پر مبینہ تشدد کرنے والے افراد ملزم وحید طاہر کے گن مین تھے۔ ذرائع کے مطابق ملزم نے خواتین کو مبینہ طور پر 15 لاکھ ڈالر کی ادائیگی نہ کرنے کی صورت میں ان کے انسانی اعضاء فروخت کرنے کی دھمکیاں بھی دیں۔ تفتیشی حکام اس پہلو سے بھی تحقیقات کر رہے ہیں کیونکہ ملزم کا نام پہلے بھی انسانی اعضاء کی غیر قانونی پیوند کاری کے معاملات میں سامنے آ چکا ہے۔
ذرائع کے مطابق ملزم وحید طاہر آئس کے نشے کا عادی بھی ہے اور طویل عرصے سے مختلف جرائم پیشہ سرگرمیوں میں ملوث رہا ہے۔